ጥቅምት 09/2019 አመት ዚትሜሐራ ዲብላንቤ ዚትገለጤው ኩትቤ ሖዲ አመት መሐዳች መሐዲናች ሞይ አብበዋ ኢሕነት ዋ ኔሮቱው መትፋጠን የሚሕራዛል አታጮትቤ መሼሐንቤ ዪትገደርዛልነተ ሀረሪ ሑስኒ ሒርጊ ጋር አፍኤድ ጌስሲ ሱልጣን አብዱሰላም ገለጡ።

21ታኝ ኢትዮጵያ መሐዳች መሐዲናች ሞይ ሑስኒ ደረጀቤ መግደርሌ ጠብዛያ ሐፍቲ አቡረቤ ሐፍለዞ መትገደር ሊሚ ሐቢዶኝ አግቡራች ሒርጊ አሜሐሩ።አርረዞቤ ተረኸቡማ ገልጌብ ዛሹ ሀረሪ ሑስኒ ሒርጊ ጋር አፍኤድ ጌስሲ ሱልጣን አብዱሰላም ዚገለጦኩትቤ፤ መሐዳች መሐዲናች ዋ ኡምመታች ሞይመትገደር ባድ ደረጀቤ አሐድነቱው ዚቅሞሸቤም ሑሉፍ አብበ ዋ ኢሕነት ዋ ዚመትሒሳሰብ ቀድራች ዩጡኙኩት ዚኻድዞ ደውሪው ተዋጠአባዩ።

አፍ ኤድዞ መድበልቤም ፤ ቁርረ አመታች ቤሔር ሐፍለዞ አደ ሊባሻችቤ ዋ ሲነ አዳ ጠብቲያችቤ መትቆመስቤ ዲባያ ጠብአኝ አሲማችሌ ዚኔሮት መንቃቀሕቲ መኽነቤ ላቂ ደውሪ ዪትፌቀሪቤ መኽነዞው አቀነኡ።

ዲባያቤም ሐፍለዞ መትገደር ወቅቲቤ አዜብዞ ጂል መገስ ሐከመዞዛጥ ዛላ ቤጆትዪሊቂኩቱም አታጮትዛላነት አትቄጠቡ።

ሀረሪ ሑስኒ ሒርጊ ጋር ሒጋኝ አፍ ኤድ ጌስሲ አሪፍ መሐመድ ገረብዚዩደሌ ፤ ሑስኒዞቤ ሐፍለዞ መትገደር ኢሾት ሚሕሪራ ጢቅምት16 ሞይቤ ሜገል ዪትሜሐርዛልነት ገለጡ።

ዪቤም ፌደራሊዝም ዋ መገስ ሐከማ ደርሲቤ ዘሼሐኑ ፓናል ሒርጊያች ፣ አይዪ ሴክተር ሚሕረ ጋራችቤ ፣ ደርሲ ተእሲሳች፣ አዜባች ዋ ኢንዶቻች ዊጣኖታች ዪኩትሶም ወረዳች ደረጀቤ አይዪ ዳይሐዋዝ ፈስሊው ዘትሳአደ ሓለትቤ ዪትሜሐርዛልነት አረደኡ።

ዪቤ ዲባያም ወለባይ ኢባሮት ፣ ጃር ሺርቲያች በሕ ኡምመትሌ ኡምመት ተቃጠሮት መኽለቅቤ ፣ ሱአል ዋ ጀዋብ አትጋፈሮት ዪኩትሶም ሪያዳ አትጋፈሮታች ፣ ደርገ ዳይሐዋዝ ኔሮት ዲላጋቹው ታኽቤ ጊርጋራ ሞሸቤ ፣ ኣደ ፌስቲቫላቹው ጠብሞሸቤ ዋ ሙዚየማቹው ዚያራ ሞሸ ሐፍለዞ መትገደር ኢሾት ሚሕሪራ ኡስጡቤ መትኻተትዚዩው ጌስሲ አሪፍ ገለጡ።

አቡረዞ አሳስቤ ሐፍለዞ መትገደር ዛሉ አያማቹም አብበ ዋ ኢሕነት ፣ አሐድነት፣ ኦሮሚያ፣ ዚሒርጊ ዋ ኢትዮጵያናች ሞይ ዪሉ መጠረሕቲያችቤ ኢስበልበላት ኢሾት ሚሕሪራች ዪትሜሐርዛሉነት ዋ ሐፍለዞ መጣለልቲም ሑስኒ ደረጀቤ ሲምፖዚየም ጠብሞሸቤ ሉይ መድገስቲቤ ዪትገደርዛልነት ገለጡ።

ሖጂ አመት 21ታኝ ኢትዮጵያ መሐዳች መሐዲናች ዋ ኡምመታች ሞይ ሐፍላ ኦሮሚያ ሑስኒ ጂማ አሲማቤ ባድ ሑቁፍ ደረጀቤ ዪትገደርዛልነት ዪታወቃል።

ሀረሪ መጅሊስ አትዋሕቤነትቤ ዩትኤቀድዛል አባዲር ወረዳ፣ አሚር ኑር ወረዳ፣ ሐረር አሲማ ጠብቲ ጋር፣ አዳ ቁራስ ዋ ዘያርነት ኢዳራ ዋ ሚይዋ ኩእ አቡሱልጣባሕ ዚ4 ጂሐ 2018 አመት አቡራ አሜሐሮት ሒካሞት ዋ 2019 አቡራ ለአይቤ ሒርጊዋ ሚርጊ አሜሐራ፡፡

ሒርጊዋ ሚርጊዞቤ ዚትረኻቡ ሀረሪ መሐድ መጅሊስ አፈ ኤይዲ ዚትገደሩ ጌስሲ ሙሕየዲን አሕመድ ዛዮኩትቤ ሀረር አኸእ ወቅቲቤ ዛልቲባ ጂሐ በጂሕ ዘጋሕ ኔሮት ዋ ሳዮት ዲላጋቹ ዚትዋሐባ ኹንቲቤ መኤቀድማ ዩቴቀብዛል ጊብቲቤ መቦረድሌ ወረዳች ዋ መክተባ ጋራች ዚኮረኦ አቡራ አሳስስቤ ኡመትዞው ተናፋኢ ያሽዛሉ ዲላጋቹ መቄመስቤ ኡኑስ ዋ ጢጢት ዌጠኖታችቤ መዌጠንቤ፣ ኢጂ ሲነትቤ፣ ነዛፋ መቄረሕ ዋ ዩትኮኡ ወሳኽ ሚይ አካዞቤ ዩጭባዛል ኡጋው ዳይቤ መትዋሐብማ መድለግ የትፊርኪዛል 2018ቤ 4ቶሽ ዚኪሕሊ ሰነድቤ ዚቀሩ ዲላጋቹ መድበልቤ 2019አመትሌ ጠብ ሞሸቤ ሐጪር ወቅቲቤ ዚኪሕሊ አስጣ ሞሻ የትኺሽዛልነቱ ገለጡ፡፡

ኦርኩትዞም አኻእ ወቅቲቤ ዚደለጉ ጆጉል ኡስጡ ሔጀሶት ዋ ኔሮት ዲላጋች መዌራ ዋ ሺርቲዜቤ ዩትረኻብዛሉ ታሪኺያ ጋራች፣ አዋች፣ መስጊዳች ዋ ኡጋችዜው ቤቀድ ዚናርቲባ ሲፋዜ ኩፎኝ መርገገብሌ የትኺሹ ማእሉማታች ዋ ቢሳሎታች አከዞቤ ዩኹኑኩት መድለግ የትኺሽዛል ነቱ አሴነኑ፡፡

ሀረሪ መሐድ መጅሊስ ሉኻ ካወንስል ዚ2019 አመት አቡራቤ ሒርጊ ዋ ሚርጊ አርራ ሀረሪ ሉኃ ካወንስል ይጠርሐዩ አቡሳማችባህ ዚ2019 ዚካወንሲልዞ አቡራ ሺርቲቤ ሒርጊ ዋ ሚርጊ አሻ::

ዚካወንስልዞ አቡሳማችባህ ዚ2019 አቡራ ሺርቲቤ ሒርጊዋ ሚርጊዞው ዚኤቀዱ ዚሀረሪ መጅሊስ አፈ- ኤይዲ ዚትገደሩ ጌስሲ ሙህየዲን አህመድ ሀረሪ ሉኃ ዩትኽሺ ደረጃ መቦረድሌ አቡሳማች ዋ ይጠርሐዩ ታእሲሳች : ዊቃሮታች ዋ ሙጋዳች ዚቅቲቤዋ ጢሚጃቤ መድለግ ዛልበዩነቱም መቤየንቲ ስጡ::

ሀረሪ ሉኃ ካውንስል አበሉያቹም ሀረሪ ሲናን መልመድ መትሌመድ ሔራው ዪነክዛልቤ: ዚመክተብ ዋ ሉኃዞ መኔራ ገረብደሌ ዚገረብዚዪ መስኡሊያው ዪትዋጠኡዛልነት ገለጠ ::

እአኺርቤም ጋርዞቤም ሐፍዛዩ ኦር ራእይያች ዋ ሱአላቹ መንሳእቤ ዲላጋ መቅናነእቲያቹ ሞረድቤ ዚሞይዞ ዲብላን ተጀመጃማ።

ሀረሪ መሐድ መጅሊስ 6ስቲ አሲማ ወረዳችዛጥ ዚ2019 አመት 3ኢሽቲ ወርሒ አቡራ አሜሐሮት ሒካሞት ገባእቲ መጅሊስዞ አፈ-ኤይዲ ዚትገደሩ ጌስሲ ሙሕየዲን አህመድ ዚትራኻቡቦ አርራቤ ወረዳ አትሒዳድሪያችቤ ሒካሞትዞ ቀረባማ ሒርጊ ዋ ሚርጊ አሜሐራ፡፡

ሀረሪ መሐድ መጅሊስ አፈ-ኤይዲ ዚትገደሩ ጌስሲ ሙሕየዲን አህመድ ዛዩኩትቤም ሀረሪ ሑስኒቤ ዩትራኻብዛሉ 6ስቲ አሲማ ወረዳች መጅሊስዞ ቃኑንቤ ዚትሰጤውማ ዚቃነነሌው ሐደፉ አታይ መቦረድሌ አቡራ መዳገንቲ ሞሸቤ ሀረሪ ሲናን መልመድ መትሌመድ፣ አዳ ፡ ቁራስ ቄረሖት ዋ ተአወኖት፣ አዋች ቄረሖት ዋ ተፋቀዶት አዞኩትዞም አኻእ ወቅቲቤ ዚደለጉ ጆጎል ኡስጡ ሔጀሶትዋ ኔሮቱ መቄረሕዋ ዋሮትዞው መጤሰሌ ኩሉ አሲማ ወረዳችቤ በያንዚታ አቡራ አሜሐሮት ገባእቲ ዩቴቀብዛልነቱ በያን አሹ፡፡

ሀረር አሲማ ወረዳ አትሒዳድሪያች ዚ2019 አመት 3ኢሽቲ ወርሒ አቡራ አሜሐሮት ሒካሞት ገባእቲዚዩቤ ዚትሜሐሩ ዲላጋች ማቤይነቤም መድረሳችቤ ሀረሪ ሉኃ ኡስታድ መትረመድዞ፣ ጁገል ኡስጡ ነዛፈ፣ አዳ ዋ ቁራስ ቄረሖት፣ አዋች ተፋቀዶትዋ ቄረሖቶት ኡጋች ጠብ ሞሻ ዲላጋ፣ መድረሳች ረንጂ መቃባእ ነዚፍ ሞሻ፣ ኡኩር መብቃል፣ዚኪርሚ ወቅቲ ዲላጋ ዋ ወለባይነት ዲላጋች ዘጋሕቤ መደለግዚዩው በያን አሹ፡፡

ሀረሪ መሐድ መጅሊስ ሒጋኝ አፈ-ኤይዲ ዚትገደሩ ጊስቲ አሚና አብዱከሪም ዚቀራባ ሒካሞቱ ኢስቲጤነቡ ቤሐርሌ ጋባእቲዞ ኪልጦኛ መዴጀዞቤ መገንታ ኢሰገበኡቤሔርሌ ዚቀረቡ ሒካሞታች ተስሒ ሞሸማ አሐድ አይና ተሕሲብቤ ዋ ዲላጋ ዩኹኑኩት መጅሊስዞ ዚቃነነሌው ሐደፍባሕ መትዋሐብማ መሌጣ ዩትፈረክባዛል ሔላው መቃየስማ መሌጣ የትኺሽዛልነቱ ቄቀሉማ ኦርኩትዞም ሀረሪ አዳዞ፣ ታሪኽዞ፣ ቁራስዞ ዋ ሉኃዞ ለአይቤ ቤጆት መስጠቤ አቡራ ሒካሞትዞ መቅረብ ዛልባነቱ አደገሱማ በያን አሹ፡፡

አኺርቤም ሀረሪ መሐድ መጅሊስ አፈ-ኤይዲ ዚትገደሩ ጌስሲ ሙሕየዲን አህመድ ሞይዞዛጥ ዲብላቤ ሐፍዛዩ ራእዩያች መጣለልቤ ዚአዳለጎት መቅናነእቲያቹ ሞረድቤ ሞይዞዛጥ ዲብላኑ አከመሉ፡፡

ሀረሪ መሐድ መጅሊስ "አለምበሕዚኛ መሕዲያ ኪሕሊ ዋ አሐድነትዚኛሌ " ዪሊ ሊሚ ዶኝቤ መጅሊስዞ ሒጋኝ አፈ-ኤይዲ ዚትገደሩ ጊስቲ አሚና አብዱከሪም ዚትራኻቡቦ አታይቤ 19ታኝ ጊርሌ አገደራ።

ዚትገደሩ ጊስቲ አሚና አብዱከሪም ሀረሪ መሐድ መጅሊስ ሒጋኝ አፈ-ኤይዲ ዛዮኩትቤም ዚኦቲዮጲያ አለምበሕ ሞይ አለምበሕ አዋጅ ሒልቂ 863/2006 (ዚጦኘቤ ) ሚጋጅ 2 አሳስቤ ሚሻ አመትቤ ጥቅምቲ ወርሒ ዪቡእማ ሜገልታኝ ሳቲ ኢስኒን ዪትገደሪኩት መስበትዞው ገለጡማ ሀረሪ መሐድ መጅለስ ደላጊያች፣ ሀረሪ ሑስኒ አሲማ ጠብቲ ጋር ዋ ሀረሪ ሑስኒ ሲቪል ሰርቪስ ሑስኒዞ ዳይ ሐዋዙ ዳይቤ አለምበሕ ጊድራው መቴቀብቤ ተኼታይ ጂልሌ ዚመቅበድ መስኡሊያዚዩው ዪትዋጠኢኩት ሉኽዚዩው ሑሉፍ አኙ።

አለምበሕ አይዪ ዳይ ሓዋዝ ኢትዮጵያናች ቲእቤ ዛል ዚባድ አሐድነት መትገለጥቲ ላቂ መሕዲያ አስጣ መኽነዞው ሞቀማ መሐድ ዳዮት አብባ ዋ ኢሕነቱው መጦኘቤ ባድዜ ሌቆት ሐፍቲው መዬቀን አኸእ ዛል ጂልቤ ዪቴቀብዛል ላቂ ዚባድ መስኡሊያ ዛልባነቱ በያን አሹ።

አለምበሕ ኢትዮጵያ ዚዳይ መትላይቲ ፣ ማንነት መትገለጥቲ ዋ አስጣ ዚታነቱው ዚትገደሩ ሀረሪ መጅሊስ ሒጋኝ አፈ-ኤይዲ በያን አሹማ ሞይዞ ዚትገደረሳ አይዪ መደኒያች አሐድነትቤ ዋ መሐድ ዳዮት፣ አብባ ዋ ኢሕነትቤ ዚዳይ ቀድራው ዚቅ ሞሸቤ መኽነ ዛልባነቱም አቀነኡ።

አኺርቤም ሖጂ አመት አለምበሕ ሞይ ዪትገደርባዛል ወቅቲቤ አለምበሕ ጊድረሌ፣ ባድ አሐድነትሌ፣ ላሉነትሌ፣ ጊድረ ዋ ፋይዳ ዚትከፈሌው ተድሒያነቱ መደኒያች የቢጁኩት ሞሸቤ ዩኹንሌ የሚችዛልነትማ አለምበሕ ሞይ መትገደር ኢስ ኤገለሌ 18 አመታቹው ዘትሔለቃ ዚኻነሳ ሖጂ አመት 19ታኝ ጊርሌ ዱሙም ባድዚኛቤ ኢስበልበላት አርራችቤ ዪትገደራል።

ሀረሪ ሑስኒ ኤመሮት ዚትዳበላ ታኽቤ ኡምመትዞ ተናፈኢነቱው መዬቀንሌ ቁጭነትቤ መድለግ ሐልባ ባይቲቤ ሑስኒዞ ረኢስ ጌስሲ ኦርዲን በድሪ ገለጡ።

ሐረሪ ሑስኒ ረኢስ ጌስሲ ኦርዲን በድሪ፤ ሑስኒዞቤ መንሲብ ዚረኸቡ ሐጂስ ሐጂስ ዳላጋ መስኡላችሌ ዲላጋ መቅናነእቲ ዋ ጂሓሰጡ።

ሉኽዚዩቤም ሑስኒዞ ኤመሮት ዚትዳበላ ታኽቤ ኔሮት ዲላጋቹው መዋረሌ ዋ ኡምመት ተናፋኢነቱው መዬቀንሌ ቁጭነትቤ መድለግ የሚችዛልነት ገለጡ።

ሑስኒዞ ሑሉፍዛዩ ጢት አመታችሌ ዪትሜሐሪቤ ዪትረኸብዛሉ ኔሮትዲላጋች ነቲጃ ዚትረአቤዩ ዋ ኢምመትዞው ተናፋኢ ዛሹ መኽነዞው ቄቀሉማ ዪው መዋረ የሚቻልባዩ።

ዚታሌም ሚሻ ደረጀቤ ዛል ኤመሮት ኡምመቱው መትአወንቤ ኡሙንነትቤ፣ ጪንጨሕቤ ዋ ቁጭነትቤ መድለግ ዪቴቀብበሓል ባይቲቤ አሴነኑ።

ሉይቤም ሮጅነቱው፣ ጢንጣኑው ቡሉል ተዳለጎቱው መትኻተርቤ ኡምመት አመንቲው መትረፍቤ ፈጢን ኢባሮት መስጠ የሚችዛልነት ገለጡ።

ተእሲሳችቤ ዪትሪእዛሉ ኢስአሐድ ኢባሮት መስጣ ቂብላናቹው መፍተሕቤ ኦር ሌስ አኽላቅ ኢባሮት መስጠ ዋ ተዳለጎቱው ኦርኩት ዘማኒያሞሸ የሚቻል ባዩ።

ዚመዳበል ተሕሲብቤ መድለግቤ ኡምመትዞ ተናፋኢነቱው የጡኝዛሉ ዚኔሮት ዲላጋቹው ኦርኩት መዝጋገሕ ዋ ነስሪሌ መብቃ የሚችዛልነቱም ረኢስዞ አትቄጠቡ።

ሀረሪ ሑስኒ ሒርጊ ጋር 7ታኝ ዶር 1ታኝ አመት መኤሰስቲ ዋ 1ታኝ ኡርፊ ሶሰሙው ሑስኒዞ ረኢስ ጌስሲ ኦርዲን በድሪ አቅሪብነትቤ ሑስኒዞ ካቢኔ መንሲብ ሙሉእ ጠበቤ አሰበታ።

ዪ አሳስቤም፦

1ታኝ / ጊስቲ ሮዛ ኡመር ሑስኒዞ ሒጋኝ ረኢስ ዋ ሐራሽነት ኔሮት ቢሮ መስኡል

2ታኝ / ጌስሲ ሙኽታር ሳሊሕ ሒጋኝ ረኢስ መንሲብቤ ሑስኒዞ አሲማ ኔሮት ዋ ኮንስትራክሽን ቢሮ መስኡል

3ታኝ / ጌስሲ ቶፊቅ መሐመድ ሑስኒዞ ሰላም ዋ አምኒ አትሒዳደሮት ቢሮ መስኡል

4 ታኝ / አዩብ አሕመድ ሑስኒዞ ዱሙም ጎዝ ማቀባ ቢሮ መስኡል

5ታኝ / ጌስሲ ያሲን አብዱላሒ ሑስኒዞ ቡኦት ቤሮ መስኡል

6ታኝ / ጌስሲ ሐምዲ ሰላሐዲን ሑስኒዞ መሐለቅ ዋ ኢቅቲሳዲ ተአወኖት ቢሮ መስኡል

7ታኝ/ ጌስሲ ፈርሓን ዚያድ ሑስኒዞ ሙወሰላት ዋ ኡጋ ኔሮት ቢሮ መስኡል

8ታኝ/ ጌስሲ መሐመድ ያሕያ ሐረሪ አሲማ ጠብቲ ጋር መስኡል

9ታኝ/ ዶ/ር አብዲ አሚን ሑስኒዞ አፌት ቢሮ መስኡል

10 ታኝ / ጊስቲ ኢማን መሐመድ ሑስኒዞ ኢንዶቻች፣ዊጃች ዋ አዜባች ሐጀ ቢሮ መስኡል

11ታኝ/ ጌስሲ ጌቱ ነገዎ ሑስኒዞ ተእሊም ኢዳራ መስኡል

12ታኝ/ ጊስቲ ጆርዳን ኢሳቅ ሑስኒዞ ፐብሊክ ሰርቪስ ዋ ኡሱእ ዲነት ኔሮት ቢሮ መስኡል

13ታኝ/ ጌስሲ በዳሳ ገመዳ ሑስኒ ኢንተርፕራይዛች ኔሮት ዋ ኢንድስቲሪ ቢሮ መስኡል

14ታኝ/ ተወለዳ አብዶሽ ሑስኒዞ አዳ ቁራስ ዋ ዘያርነት ቢሮ መስኡል

ሀረሪ ሑስኒ ሒርጊ ጋር 7ታኝ ዶር 1ታኝ አመት መኤሰስቲ ዋ 1ታኝ ኡርፊ ሶሰምዞቤ ሒጋኝ አፍ ኤድነትቤ ጌስሲ አሪፍ መሐመዱው ሙሉእ ጠበቤ መለሐ።

መሰከረም 22/2019 ሀረሪ ሑስኒ ሒርጊ ጋር ገልመቤ 7ታኝ ዶር 1ታኝ አመት መኤሰስቲ ዋ 1ታኝ ኡርፊ ዲብላንቤ ዚትገደሩ ጌስሲ ኦርዲን በድሪው ሑስኒዞ ረኢስ ሞሸቤ ሙሉእ ጠበቤ ሐጂስቤ መንሲብ ሰጤዮ።

ሀረሪ መሐድ መጅሊስ 7ታኝ ዶር 1ታኝ አመት 1ታኝ ኡርፊ ዲብላንዞው አው መሐመድ ዛሾ ዱዋኦትቤ ዜገላ ዚኻነሳ መትኽተልቤም 7ታኝ ዶር ሀረሪ መሐድ መጅሊስ ተመላሒ አግቡራቹ ዱሙም ዲዋን ጋር ረኢስቤ አሕዲ መቴሰብቤ መጅሊሱው አግቡራችቤ አትሜልሒ ሐቢዶኝነትቤ 1ታኝ ጌስሲ ሐምዲ ሰላሕአዲን ሳምቲነትቤ 2ታኝ ጊስቲ ኢማን መሐመድ 3ታኝ ጊስቲ ኢሪት በርኽድሌው ሙሉእ ጠበቤ መለሐ፡፡

መትኽተልቤም አትሜልሒ ሐቢዶኝዞ አርራዞው መትቀበድቤ ሀረሪ መሐድ መጅሊስ አፍ- ኤይዲነትቤ ዚትገደሩ ጌስሲ ሙሕየዲን አሕመድ ሐሰኑ ሙሉእ ጠበቤ መለሐ፡፡ ዚትገደሩ ጊስቲ አሚና አብዱከሪም መሐመዱ ሒጋኝ አፍ-ኤይዲነትቤ ሙሉእ ጠበቤ ዘትሜላሐ ዘኻነሳ ቢሔርዞም ሀረሪ ዱሙም ዲዋን ጋር ረኢስቤ መጅሊስዞ አፈ-ኤይዲ ዋ ሒጋኝ አፈ-ኤይዲው አሕዲ መቴሰብ ሚሕሪራ ተሜሐራ፡፡

ዚትገደሩ ሀረሪ መሐድ መጅሊስ አፍ-ኤይዲ ጌስሲ ሙሕየዲን አሕመድ ዛአሾ ገልጌብቤም መጅሊስዞቤ ዚትሰጤዩ ጊዲር ኡመት አማናው መትቄበልዚዩው ገለጡማ አማነዞው አከዞቤ መትዋጣእሌ መጅሊስዞ አግቡራች ዋ ሀረር ዳይ ሐዋዝ ሜጠቅዚዩቤ ዩቃኒኩት ኪላሖትዚዩው አቀረቡ፡፡

መትኼተልቤም ሀረሪ ሑስኒ ረኢስነትቤ ዩኢቅዲዛሉ ሒንጫይ ዚትገደሩ ጌስሲ ኦርዲን በድሪ ሐምዶኙ ሙሉእ ጠበቤ አሰበታ፡፡ ሑስኒዞ ሒጋኝ አፍ-ኤይዲ ሒንጫይነትቤ ዚትገደሩ ጌስሲ አሪፍ መሐመድ አዱሱ ሙሉእ ጠበቤ መለሐ፡፡

አኺርቤም ሀረሪ መሐድ መጅሊስ 7ታኝ ዶር 1ታኝ አመት 1ታኝ ኡርፊ ዲብላንዞው ዱዋኦትቤ አከመላ፡፡